Shperndaje
Në 115-vjetorin e lindjes të Dhimitër Paskos (Mitrush Kutelit) i akordohet "Nderi i Akademisë".
Kryetari i Akademisë së Shkencave, akad. Skënder Gjinushi i akordoi Dhimitër Paskos "Nderi i Akademisë". Diplomën ia dorëzoi së bijës Atalanta Paskos në konferencën shkencore “Mitrush Kuteli, shkrimtari, studiuesi, përkthyesi” e cila u mbajt sot më 8 korrik 2022.
Në vlerësim të kontributit të madh të Mitrush Kutelit në fushën e letrave, juria e posaçme, e përbërë nga Kryesia e Akademisë së Shkencave dhe kryetarët e komisioneve të përhershme, me vendimin nr. 40, datë 7.07.2022, bazuar në propozimin e njëzëshëm të Seksionit të Shkencave Shoqërore dhe Albanologjike, vendosi t’i akordojë Dhimitër Paskos mirënjohjen publike më të lartë që jepet nga ky institucion, "Nderi i Akademisë", me motivacionin:
Shkrimtar me veprimtari krijuese origjinale në prozë dhe poezi; një ndër themeluesit kryesorë të prozës moderne shqiptare; mjeshtër i ligjërimit e rrëfimit, fantazisë dhe së magjishmes; krijues e rikrijues virtuoz mbi bazën e motiveve tradicionale të botës shqiptare; shqipërues i kryeveprave botërore dhe pasurues i gjuhës shqipe; publicist e mendimtar kritik; studiues me vepra të suksesshme në disa fusha të dijes; veprimtar gjurmëlënës në rrugën e përparimit shoqëror e qytetar të vendit.
Konferenca shkencore në 115-vjetorin e liindjes së Mitrush Kutelit u organizua në Sallën “Aleks Buda”, Akademia e Shkencave e Shqipërisë në bashkëpunim me Bashkinë Pogradec dhe Universitetin “Fan S. Noli” Korçë. Fala e rastit nga Kryetari i Akademisë së Shkencave akad. Skënder Gjinushi ,fjale përshëndetje nga z. Ilir Xhakolli, Kryetar i Bashkisë së Pogradecit, ku u fol për kontributin që Kuteli dha ne qytetin e Pogradecit dhe jo vetëm. Të pranishëm në sallë ishin miq, familjare dhe intelektualë të vendit si Anastas Angjeli, Arian Leka, Adrian Civici, Vaso Tole, Dhimitri Bello, Shaban Sinani, Pandeli Pasko, Neli Naço etj.
Kryetari i Bashkisë i dhuroi Akademisë edhe nje portret të Mitrush Kutelit realizuar nga autorja Meri File, e cila do të vendoset në fondin e pikturave të akademikëve.
#AShSh
#MitrushKuteli
#BashkiPogradec
Shperndaje