Shperndaje
8 Marsi “Dita Ndërkombëtare e Gruas”,në kuadër të kalendarit evropian përkujton lëvizjen për të drejtat e grave e cila nuk është një ditë e feminizmit ekstrem, por momenti kur të gjithë jemi të ftuar të reflektojmë për çështje që lidhen me botën femërore, mbi arritjet e mëdha, çështje sociale dhe politike që lidhen me mundësi të barabarta dhe hapat e ardhshëm që duhen ndërmarrë për të kapërcyer boshllëqet që ekzistojnë ende. Simbolika e kësaj dite është aktualizimi i kërkesave për përmirësim të kushteve në të cilat punojnë gratë, si dhe përmirësim në aspektin e cilësisë të statusit të tyre socio-politik në shoqëri. Kjo ditë shërben jo vetëm për bashkimin e grave pa dallim feje, race, kulture, gjuhe dhe prejardhjeje, por edhe për të kujtuar përpjekjet për barazi, paqe, drejtësi.Të drejtën e votimit, të qeverisjes, të punës, të edukimit si dhe ndalimin e diskriminimit në punë. “Të punojmë për barazi” është motoja e kësaj dite, ku secili nga ne mund të jetë lider në fushën e vet të veprimit, me qëllim që të promovohet dhe arrihet barazia gjinore. Njësia e Koordinimit të Integrimit Evropian dhe Ndihmës së Huaj në Bashkinë Pogradec, në kuadër të kësaj dite organizoi aktivitetin me temë: “ Bashkë për gratë dhe vajzat ” Organizimi i kësaj dite u bë ambientet e Sallës së Këshillit Bashkiak dhe pati në fokus pikërisht të drejtat e grave, ndërgjegjësimin e tyre në lidhje me këto të drejta si dhe rolin që duhet të luajnë të gjitha institucionet për të forcuar rolin e gruas në shoqëri. U shfaq një prezantim të asaj cfarë simbolizon kjo ditë dhe asaj çfarë është bërë ndër vite në Bashkinë Pogradec në lidhje me këtë temë, prezantimi i politikave gjinore që Bashkia Pogradec ka prioritizuar për vitin 2022 dhe në vazhdim. U krye një përmbledhje të nevojave/problematikave të identifikuara kryesisht për gra kryefamiljare, gratë nga shtresa të marxhinalizuara dhe ato që janë pjesë e skemës së ndihmës ekonomike. U bë prezantimi i një broshure të konceptuar nga Njësia e Integrimit në të cilën është pasqyruar jeta e disa prej grave të njohura të qytetit të Pogadecit të cilat kanë dhëne një kontribut në shoqëri me përpjekjen dhe punën e tyre dhe sot janë shembull për shume gra e vajza. Pjesëmarrës në këtë aktivitet ishin dhe gra nga institucione te ndryshme,shoqeria civile, Shoqata ‘’Gruaja intelektuale”, “Une Gruaja”,që dhanë suportin e tyre duke treguar që falë përpjekjeve të tyre kanë arritur një status të caktuar në shoqëri. Qëllimi i këtij aktiviteti është informimi dhe ndërgjegjësimi i te gjitha grave dhe vajzave për t’u njohur me të drejtat e tyre dhe rëndësinë e zbatimit të këtyre të drejtave nga shoqëria, familja dhe çdo institucion. Ky aktivitet u realizua në bashkëpunim me Drejtorinë e Shërbimit Social. Aktiviteti u financua nga projekti “Bashkitë për në Evropë”.
Shperndaje