Thirrja për Grante 2026, Apliko!

Është një nga programet më të rëndësishme të mbështetjes financiare për startup-et dhe strukturat mbështetëse në Shqipëri me fonde të Buxhetit të Shtetit. Skema e re synon të nxisë inovacionin, zhvillimin e bizneseve të reja dhe forcimin e ekosistemit sipërmarrës, me një fond total prej 3 milionë euro të alokuar për vitin 2026.Pas përfundimit të fazës së parë të aplikimeve ku u dërguan mbi 1000 aplikime, në 2 Korrik janë shpallur fituesit e thirrjes së parë.Pritet shpallja  fazës së dytë të aplikimeve ku fondi i grantit është dyfishuar në 6 milionë euro.

Me hapjen e Grantit 2026, startup-et shqiptare dhe aktorët e ekosistemit të inovacionit kanë një mundësi konkrete për të financuar idetë e tyre dhe për t’i kthyer ato në produkte dhe shërbime reale,duke kontribuar në zhvillimin ekonomik, digjital dhe të qëndrueshëm të vendit. Sipas thirrjes së Grant 2026, mund të aplikojnë edhe individë (persona fizikë) me një ide startup, si dhe startup-e të krijuara, për sa kohë plotësojnë kriteret e programit.

Çfarë mbështet GRANT 2026?

1.STARTUP-e me potencial zhvillimi

2.Projekte inovative dhe teknologjike

3.Krijimi i bizneseve të reja

4.Një ekonomi konkurruese dhe e bazuar tek inovacioni.

Skema e re bazohet në rezultatet e vitit 2025, kur u dorëzuan mbi 420 aplikime dhe u financuan 81 projekte, duke arritur një nivel shumë të lartë të përdorimit të buxhetit. Një pjesë e konsiderueshme e financimeve të vitit të kaluar shkoi për iniciativa në ekonominë e gjelbër dhe ekonominë digjitale, gjë që ka çuar në një fokus edhe më të madh në këto fusha për vitin 2026.

Për Grant 2026, financimi është ndarë sipas fazës së zhvillimit të startup-it. Kjo do të thotë se sa më i avancuar të jetë projekti, aq më i madh është granti, por kërkohet edhe bashkëfinancim më i lartë.

Përfituesit do të ndahen në tre kategori kryesore. Një pjesë e rëndësishme e buxhetit do t’u dedikohet projekteve që lidhen me teknologjinë dhe ekonominë e gjelbër, me synimin për të mbështetur ide që kontribuojnë në transformimin digjital dhe zhvillimin e zgjidhjeve të qëndrueshme për mjedisin.

Thirrja është e hapur për startup-et në fazat e hershme, ku mund të aplikojnë individë privatë shqiptarë ose të huaj, si dhe për strukturat mbështetëse si universitetet publike dhe private, inkubatorët, akseleratorët dhe organizata të tjera që luajnë rol në zhvillimin e ekosistemit të inovacionit.

Skema ofron nivele të ndryshme financimi në varësi të fazës së zhvillimit të projektit, duke mbuluar nga 75% deri në 100% të kostove, me vlera që variojnë nga mbështetja më e vogël për idetë fillestare deri te financimet më të mëdha për startup-et në fazën e rritjes ose për strukturat që mbështesin zhvillimin e tyre.

Fushat prioritare për Grantin 2026 mbeten ekonomia e gjelbër dhe sektori digjital. Në këtë kuadër, programi synon të mbështesë iniciativa në:

  • energjinë e rinovueshme;
  • bujqësinë e qëndrueshme
  • menaxhimin e mbetjeve;
  • eficiencën energjetike;
  • transportin e qëndrueshëm;
  • ruajtjen e burimeve ujore;

si dhe projekte në:

  • teknologjinë e informacionit;
  • zhvillimin e software-ve;
  • inteligjencën artificiale;
  • sigurinë kibernetike;
  • blockchain;
  • platformat digjitale.

Qasja e programit është të zhvillojë paralelisht inovacionin teknologjik dhe zgjidhjet e gjelbra, si dy shtylla kryesore të zhvillimit ekonomik.

Procesi i aplikimit dhe dokumentacioni do të kryhen plotësisht në mënyrë elektronike përmes platformës e-Albania. Startup-et nuk kanë nevojë të dorëzojnë dokumente fizike, pasi kërkohen vetëm formulari i aplikimit dhe buxheti i projektit. Strukturat mbështetëse duhet të paraqesin dokumentacion ligjor dhe financiar që vërteton aktivitetin e tyre.

Dokumentacioni i kërkuar

Për startup-et:

  • Nuk kërkohen dokumente fizike.
  • Kërkohen vetëm:
    • formulari i aplikimit;
    • buxheti i projektit.

Për lehtësuesit / strukturat mbështetëse:

  • Regjistrimi ligjor.
  • Dy pasqyrat e fundit financiare të certifikuara.
  • Dokumentacion mbi aktivitetet e zhvilluara gjatë dy viteve të fundit.
  • Akti i themelimit dhe statuti (për OJF-të).Aplikimet do të vlerësohen nga një komision i posaçëm, me të drejtë ankimi dhe me nënshkrimin e kontratave për përfituesit e përzgjedhur brenda afateve të përcaktuara.

Sipas rregullores së programit Startup Albania, për të përfituar grant duhet të jeni të vetëdeklaruar në Regjistrin Elektronik të Startup-eve dhe Lehtësuesve të Startup-eve dhe të pajiseni me Pasaportën e Startup-it.

Për t'u bërë pjesë e skemës së granteve:

  1. Regjistroheni në Regjistrin Elektronik të Startup-eve.
  2. Pajiseni me Pasaportën e Startup-it.
  3. Më pas aplikoni për grant sipas fazës përkatëse

https://startupalbania.gov.al    linku i regjistrimit në e-albania