Shperndaje
"Restaurimi dhe Rikualifikimi Urban i Qendrës Historike dhe Zonës së Mbrojtur të Qytetit të Pogradecit" është një prej investimeve më madhore për të cilin Bashkia Pogradec dhe Kryetari z. Ilir Xhakolli janë zotuar për ta realizuar. Qëllimi i projektit është rikualifikimi urban i dy zonave historike "Topleci" dhe "Naim Frashëri", duke rritur maksimalisht potencialin turistiko-kulturor në këto dy zona me qëllim që banorët dhe bizneset të kenë mundësinë të zhvillojnë turizmin familjar si një formë e re e pritjes dhe shërbimit ndaj vizitorëve e turistëve.
Për të sqaruar të gjithë banorët e bashkisë tonë, NE nuk e kemi tenderuar këtë projekt, e aq më tepër zbatuar atë as dy as tre apo edhe më shumë herë.
Është hera e parë që këto zona kanë tashmë një projekt serioz rikualifikimi, një pjesë e shfaqur edhe në foto. E kemi thënë edhe më herët dhe po e rikujtojmë sërish se Bashkia Pogradec i ka siguruar fondet edhe për projektin në fjalë edhe për shëtitoren buzë liqenit nga KFW-ja Gjermane. Këto fonde kanë kaluar tashmë dhe pas miratimit edhe në Kuvendin e Shqipërisë që do të bëhet shumë shpejt, nisin më pas të gjitha procedurat ligjore për realizimin e investimit nga FSHZH.
Duam të sjellim në vëmendje gjithashtu se kanë qenë ekspertë të fushës ata që kanë përgatitur këtë projekt duke përfshirë edhe intelektualë poradecarë, përmendim veç njërin prej tyre piktorin e mirënjohur z. Anastas Kostandini (Taso) e shumë të tjerë.
Projekti është gati.
Financimi po ashtu.
"Topleci" dhe Rr. "Naim Frashëri" shumë shpejt do të kenë pamjen e merituar, Shtëpitë Muze të Lasgushit e Mitrushit të ndërthurura mjeshtërisht me elementë urbanë karakteristikë dhe gjithçka tjetër. Do të jetë një nga polet turistike më të reja të Pogradecit e cila do të hapë një faqe të re për alternativat turistike të qytetit dhe zhvillimit ekomomik të banorëve.
Shperndaje