Urim i fundvitit, Bashkia Pogradec

Viti që po lëmë pas ka qenë i vështirë për të gjithë pogradecarët dhe shqiptarët. Pandemia ngadalësoi zhvillimin dhe projektet e shumta që ishin parashikuar, por përtej vështirësive, ne arritëm t'ia dalim që të nisnim dhjetra projekte, mes tyre edhe madhore, në shërbim të komunitetit qytet dhe fshat.

Kemi punuar fort që të realizojmë me përpikmëri të gjitha shërbimet publike ndaj banorëve të bashkisë tonë dhe besojmë se kemi arritur të jemi më të shpejtë në reagim dhe të ofrojmë shërbime shumë më të mira. Kemi realizuar dhjetra projekte, të tjerë janë në zbatim, për të krijuar një qytet më miqësor, me më shumë ngjyra, me infrastrukturë të mirë, me hapsira publike më të këndshme, për ta bërë më tërheqës për vizitorët dhe turistët, ndërkohë që në shumë kantierë, në fshat e qytet vijon puna për finalizimin e investimeve.

I kemi kushtuar një vëmendje të madhe jetës kulturore, me programin veror, shfaqje, koncerte, aktivitete me të rinjtë etj, për të gjallëruar më shumë jetën dhe aktivizuar të rinjtë e qytetit dhe shkollave.

Viti që po vjen ka më shumë sfida e rrjedhimisht më shumë zotime që kemi marrë përsipër të realizojmë. Dhjetra projekte të vogla dhe të mëdha presin të marrin jetë me qëllimin e vetëm: Për të përmirësuar edhe më tej jetesën, shërbimin, infrastrukturën dhe paketën turistike.

Shumë është bërë, jemi të bindur se ka shumë më shumë për të bërë dhe sëbashku me ju, pogradecarët anë e kënd rrethit e të gjithë ata që janë jashtë kufijëve, do të ndërtojmë Pogradecin e të ardhmes, Pogradecin e dashur për çdokënd!

Kemi fatin që Zoti dhe natyra janë treguar bujarë me ne, që nga Liqeni, monumentet historike, kulturore dhe natyrore, duke krijuar një paketë të plotë turistike. Ajo çfarë na duhet është ta promovojmë sëbashku, pasi turizmi dhe agroturizmi janë shtyllat kryesore për të krijuar të ardhura të mira për çdo familje.

Ne jemi në punë, e kemi vizionin se ku duam ta çojmë Pogradecin dhe me mbështetjen e banorëve, institucioneve, qeverisë, instancave ndërkombëtare, do të arrijmë që përgjatë vitit 2022 të realizojmë çdo objektiv tonin.
Gëzuar, shëndeti, ngrohtësia dhe dashuria mbizotëroftë në çdo shtëpi pogradecare dhe shqiptare.
Bashkë për P❤GRADECIN që Duam!